Foto GPCM.
O alcalde de Monforte, José Tomé Roca, anunciou o remate das obras de renovación do parque infantil do CEIP A Gándara, que dende esta semana xa pode ser utilizado polo alumnado do centro. A actuación, cun investimento de 47.000 euros, supuxo a reforma completa dunha área de xogos que, segundo a memoria do proxecto, tiña a súa vida útil esgotada e non cumpría coa normativa vixente.
Os traballos incluíron a execución dunha solera de formigón de 12 cm de espesor e a instalación dun pavimento de caucho continuo de dúas capas, co obxectivo de garantir a seguridade dos nenos e nenas. Tamén se renovou e reubicou o equipamento existente, como balancíns, pérgola, arenero e bancos, e engadíronse novos elementos: tobogán, trepas, xogos múltiples e unha caseta XXL.
Ademais, colocouse céspede artificial na zona próxima á pérgola como área de transición. Tomé destacou que, malia non ser competencia directa do Concello, a actuación era necesaria para ofrecer un espazo seguro, moderno e adaptado ás necesidades do alumnado.•
Cargando ...
