Sarria acolle a segunda exposición do programa de arte contemporánea Trienal de Sarria, unha iniciativa promovida polo colectivo HU-HU e apoiada pola área de Cultura da Deputación de Lugo. A mostra inaugúrase no espazo expositivo A Sede, situado na rúa Ramón Cabanillas, onde permanecerá aberta ata o mes de setembro.
Esta nova exposición colectiva, comisariada por Juan Luis Toboso, reúne as creacións de catro artistas: a viguesa Loreto Martínez Troncoso, a portuguesa María Paz Aires, o ourensán Lois Cid e o sarrián Rubén Santiago. A proposta leva por título “Eu vin cousas que vós non creriades” e agrupa distintas disciplinas artísticas baixo unha mirada contemporánea.
O vicepresidente da Deputación de Lugo, Efrén Castro valorou positivamente a iniciativa de HU-HU, coa que comparte dende o principio “a idea deste proxecto”. Castro resaltou que esta proposta achega a arte contemporánea a Sarria, “fóra dos circuítos urbanos onde normalmente se exhibe esta actividade”, e subliñou a importancia do achegamento á arte portuguesa para fortalecer os lazos culturais entre ambos os territorios.
O programa Trienal de Sarria é un proxecto experimental de arte contemporánea que se desenvolverá entre 2024 e 2026, cun total de cinco bloques expositivos principais. Cada bloque presenta unha exposición central que inclúe obras e proxectos sensibles ao contexto local e transnacional de Galicia, Portugal e o noroeste peninsular. O programa promove tamén actividades paralelas e formacións en colaboración con centros educativos e entidades locais.
A Sede Sárria-Núcleo Difusor de Arte Contemporánea, un espazo versátil de 266 metros cadrados situado nun antigo recinto industrial da década de 1940, funciona como centro neurálxico das actividades da Trienal. O seu deseño minimalista respecta os elementos orixinais do edificio, ofrecendo un lugar único para a difusión da creación contemporánea nun territorio con escaseza de infraestruturas culturais.
A mostra e as actividades asociadas á Trienal poderán visitarse e participar de forma gratuíta, promovendo o acceso e o diálogo entre os artistas e o público da comarca.•
Cargando ...
