A Concellaría de Igualdade de Chantada organiza un ano máis os Campamentos de Verán, dirixidos a nenas e nenos de entre 3 e 12 anos. Haberá tres quendas entre finais de xuño e xullo, con actividades no CEIP Xoán de Requeixo e no IES Lama das Quendas, en horario de 10:00 a 14:00 horas e con servizo de madrugadores desde as 8:00. As inscricións poden realizarse nos Servizos Sociais ata o 18 de xuño.
Cada ano participan destes campamentos uns 200 rapaces/zas por quincena. Todas as actividades son gratuítas e van desde propostas deportivas con deportes mixtos, como baloncesto, voleibol, fútbol,…a obradoiros de expresión plástica e artística para a adquisición de habilidades sociais, con lectura, teatro ou música. Segundo o alcalde, Manuel Lorenzo Varela, “outro verán máis centos de nenos e nenas poderán inscribirse en propostas que fomentan o respecto, a comunicación e a iniciativa”.
Do 1 ao 14 de agosto desenvolverase tamén un Campamento Dixital para rapazada de 9 a 13 anos na aula Cemit. A iniciativa,ofrece formación básica en competencias dixitais. Hai 25 prazas, que se cubrirán por orde de inscrición.•
Cargando ...
