Coque Malla, Dorian, Abraham Mateo e Nil Moliner, estrelas das Festas Patronais de Monforte

Coque Malla, prato forte das Festas Patronais deste ano, é historia viva musical do noso país, tanto pola súa carreira en solitario, como pola súa etapa cos Ronaldos. Foto CM.

O alcalde de Monforte, José Tomé Roca, presentou o cartel de concertos das Festas Patronais 2025, acompañado pola primeira tenente de alcalde, Gloria Prada, e pola concelleira de Cultura, Marina Doutón. Os festexos desenvolveranse entre o 11 e o 16 de agosto, cun total de seis actuacións principais acompañadas de orquestras e bandas locais, mantendo a liña musical dos últimos anos.
Segundo explicou o rexedor, a proposta busca ofrecer “unha ampla variedade musical e artística, para dar satisfacción a públicos moi diferentes tanto en idades como en gustos musicais”. Tomé asegurou que Monforte “se ten convertido nun referente en Galicia” grazas á calidade das súas festas, e que o obxectivo é manter ese nivel.
A programación comezará o luns 11 coa actuación do grupo A Roda, trala lectura do pregón na Praza de España. Cunha traxectoria de case 50 anos, A Roda é unha referencia na música tradicional galega e no cancioneiro popular.
O martes 12, a Orquestra Panorama regresará á explanada do río Cabe cun espectáculo dividido en dous pases, entre as 00:00 e as 2:00 e novamente entre as 3:30 e as 4:30. Compartirá a noite co Grupo América de Vigo, que tamén ofrecerá dúas intervencións: antes da Panorama, de 22:30 a 00:00, e entre as 2:00 e as 3:30. “A explanada vaise quedar pequena, como vén ocorrendo nos últimos anos”, sinalou o alcalde.
O mércores 13 será a quenda de Coque Malla, un dos nomes máis recoñecidos do pop-rock español, que celebra neste 2025 os seus corenta anos sobre os escenarios. Actuará entre as 00:00 e a 1:30, mentres que a Orquestra Galilea amenizará o resto da noite con dous pases.
O xoves 14, a música indie e electrónica chegará da man de Dorian, que presentará o seu último traballo Futuros imposibles. Tocarán a partir das 00:00 e ata a 1:30, compartindo cartel cos monfortinos Gin Toni’s e Movilla y Los Irrepetibles. Estes grupos locais actuarán antes e despois do concerto principal, reforzando, en palabras do alcalde, “a aposta polo talento local”.
O venres 15, día grande das festas, Abraham Mateo encargarase do concerto principal, previsto para as 00:30 tras os fogos do Castelo de San Vicente. Este artista andaluz, con máis de 4 millóns de oíntes mensuais en Spotify, ofrecerá un espectáculo de gran formato ata as 2:00. A Orquestra Suavecito completará a noite cun dobre pase.
O sábado 16 pecharase o ciclo de concertos con Nil Moliner, un dos músicos máis populares do momento, que se atopa en plena xira “Lugar Paraíso”. A súa actuación comezará trala sesión de fogos do río, entre as 00:30 e as 2:00, mentres que a Orquestra Salsarena porá a guinda final á programación.
O alcalde de Monforte, José Tomé Roca, concluíu a rolda de prensa salientando a “calidade e variedade” da proposta e expresou o seu desexo de que “moitos galegos e galegas nos visiten atraídos polos concertos de Monforte”.
O PP de Monforte critica a “falta de información” sobre a programación de verán
O PP de Monforte acusa ao alcalde José Tomé de manter a veciñanza “na desinformación” sobre as actividades de verán. A voceira Katy Varela pide que se publique xa a axenda de lecer e que se anuncien as opcións dispoñibles a través da web e redes sociais municipais. “Non pode repetirse que se publique o libro en agosto con actos xa pasados”, afirma. Os populares monfortinos reclaman tamén “transparencia e participación” na elección dos concertos das festas patronais. “Se os veciños os disfrutan, alegrámonos, pero botamos en falta variedade e diálogo cos grupos da corporación”, engade Varela.•

Deixa unha resposta

Your email address will not be published.

Enquisas

ESTÁ CONFORME CO PROXECTO PARA CONSTRUÍR UNHA NOVA PONTE DE FERRO NO MALECÓN EN SUBSTITUCIÓN DA PASARELA PEONIL ACTUAL?

Cargando ... Cargando ...

Resumen mensual de noticias

Nova Anterior

A SD Sarriana xogarase o ascenso a 2ª Federación na Ribela logo do empate en Pulpí

Seguinte Nova

Navega polo impactante Canón do Sil coa Deputación de Lugo. A visita imprescindible para coñecer a Ribeira Sacra

Últimas noticias sobre CULTURA

Ir aInicio

Don't Miss