O concello de Pantón converterase esta semana no epicentro musical da Ribeira Sacra coa celebración da sexta edición do Festival Trece Roeis, que terá lugar os días 20 e 21 de xuño. A cita, xa consolidada como unha das máis destacadas da provincia de Lugo, ofrecerá unha programación diversa que mestura estilos como o rock, o punk, a música tradicional galega e propostas contemporáneas.
CARTEL DE LUXO
O cartel deste ano inclúe actuacións de artistas recoñecidos no panorama galego e estatal. O venres subirán ao escenario Gin Toni’s, Trashtucada, Dakidarría, Linaje, Laura DSK, Caamaño & Ameixeiras, Leo de Matamá e Baturruka. O sábado será a quenda de Sés, Sínkope, Ilegales, Radiocrimen, Rastreros, Montedapena, Brais das Hortas e Festicultores Troupe, que pecharán o festival cun espectáculo cargado de enerxía.
Ademais da música, o Trece Roeis aposta por dinamizar o rural galego a través dunha programación paralela que inclúe catas de viño, degustacións gastronómicas e unha feira de artesanía, cuxo prazo de inscrición continúa aberto na web oficial do evento. Esta combinación de cultura, lecer e promoción do territorio converte o festival nun escaparate da identidade local. Durante a presentación do evento no Pazo de Ferreiroá, a Deputada de Turismo, Pilar García Porto, destacou que “o Trece Roeis é un auténtico punto de encontro para todas as xeracións, con propostas que enriquecen a experiencia e que contribúen a crear un ambiente único”. A Deputación de Lugo incrementou este ano a súa achega ata os 7.200 euros, reforzando así o seu apoio a unha iniciativa que, segundo García Porto, “xera valor engadido para o conxunto da sociedade”.
As entradas están dispoñibles na páxina web www.trecereisfest.com, cun prezo de 18 euros por día ou 27,50 euros o abono completo.•
Cargando ...
