A subdelegada do Goberno en Lugo, Isabel Rodríguez, animou ás entidades culturais da provincia a presentar proxectos á nova liña de axudas convocada polo Ministerio de Cultura para promover iniciativas colaborativas no medio rural. A convocatoria, publicada no Boletín Oficial do Estado, está dotada con 680.000 euros e permitirá financiar ata o 80 % do orzamento de cada proxecto, cun máximo de 120.000 euros por beneficiario.
Segundo explicou Rodríguez, poderán acollerse a estas axudas tanto entidades privadas con ou sen ánimo de lucro como profesionais autónomos do sector cultural. Como requisito, os proxectos deberán desenvolverse no ámbito rural e contar coa participación de polo menos tres axentes de tres comunidades autónomas distintas.
A subdelegada sinalou que o obxectivo da medida é “impulsar a actividade cultural nas zonas rurais e promover proxectos de dimensión local e rexional que fortalezcan a cohesión territorial”. Teranse especialmente en conta as propostas que aposten pola innovación, contribúan ao desenvolvemento do tecido cultural e fomenten a participación cidadá.
As actuacións deberán executarse entre o 1 de xaneiro de 2025 e o 31 de decembro de 2026 en concellos de menos de 30.000 habitantes cunha densidade inferior aos 100 habitantes por km² ou en municipios con menos de 5.000 residentes, independentemente da súa densidade.
Rodríguez puxo en valor esta iniciativa como parte da estratexia estatal para apoiar a cultura e garantir o acceso á mesma en todo o territorio, incluídas as zonas con menor poboación.•
Cargando ...
