Os concelleiros do Grupo Municipal do PP de Monforte expresaron a súa inquietude logo de transcender que o nome da cidade podería figurar nun informe da Unidade Central Operativa da Garda Civil no marco da Operación Koldo. A voceira dos populares, Katy Varela, sinalou que “segundo as informacións que nos chegan, ese documento faría referencia a unha suposta adxudicación irregular relacionada coas obras de emerxencia executadas por Adif entre Monforte e Lugo, cun orzamento de preto de 1,5 millóns de euros”.
Segundo apunta Varela, o empresario Daniel Fernández Menéndez tería solicitado a mediación de Koldo García para favorecer a unha empresa concreta na concesión da obra. Varela puntualizou que non teñen constancia de que o alcalde, José Tomé, figure no informe, mais manifestou a súa preocupación por “ver nomes vinculados ao noso municipio, como a pregoeira das últimas festas, Isabel Pardo de Vera, ou o secretario Santos Cerdán, que estivo recentemente en Monforte co alcalde”.
Os populares piden prudencia pero advirten que, de confirmarse información relevante, esixirán explicacións: “Non imos permitir que se manche o nome da nosa cidade”, asegurou Varela, quen adiantou que probablemente no próximo pleno municipal lle pregunten ao alcalde “se podemos estar tranquilos ou se existe o risco de que aparezan novos informes que impliquen directamente a Monforte ou ao propio rexedor”.
Pola súa banda, o presidente do Goberno, Pedro Sánchez, compareceu o xoves na sede de Ferraz para pedir perdón á cidadanía e á militancia socialista. O líder do PSOE anunciou a dimisión de Santos Cerdán e comprometeuse a impulsar unha auditoría externa das contas do partido, así como unha reforma na dirección federal. Sánchez reiterou a súa aposta por unha “política limpa” e pola “tolerancia cero contra a corrupción”.•
Cargando ...
