O Concello de Ribas de Sil organizou unha xornada de portas abertas no novo Xeocamping Montañas do Courel, que entrará en servizo nas vindeiras semanas. Numerosos veciños e veciñas achegáronse ata San Clodio para coñecer de primeira man unhas instalacións que contaron cun investimento próximo aos 150.000 euros da Deputación de Lugo a través do Plan Deputación.
A Deputada de Turismo, Pilar García Porto, participou no acto xunto ao alcalde, Roberto Castro, e destacou que o proxecto “é un exemplo claro de como pequenos proxectos, ben pensados e ben enraizados no territorio, poden ter un gran impacto dinamizador”. Subliñou tamén que o xeocamping ofrece servizos de calidade e contribúe a fixar poboación e proxectar unha imaxe moderna e sostible da provincia.
A Deputada sinalou que este servizo encaixa perfectamente co modelo de desenvolvemento turístico no que traballa desde hai anos a Deputación, “un turismo sostible, non masificado, de experiencias auténticas, vividas sen presas, e que pon en valor o noso territorio, a nosa paisaxe, o noso patrimonio e, por riba de todo, a nosa xente”. O complexo conta con oito bungalós, edificio de recepción, espazo multiusos, zona de lavandería, barbacoas, piscina e 14 parcelas de acampada. A capacidade total ronda as cen prazas. A xornada coincidiu coa apertura da XXI Festa da Cereixa, do Viño e do Aceite.•
Cargando ...
