Foto GPSDL.
A subdelegada do Goberno en Lugo, Isabel Rodríguez, presidiu o venres a Xunta Local de Seguridade de Sarria para coordinar o dispositivo especial con motivo das festas de San Xoán, que se celebrarán entre os días 20 e 24 de xuño. No encontro participou tamén o alcalde, Claudio Garrido, así como representantes das forzas e corpos de seguridade.
Durante a xuntanza, apelouse á responsabilidade cidadá nestas datas e valorouse o descenso da taxa de criminalidade no municipio, que pasou do 28,89 % en 2023 ao 27,04 % no que vai de ano. Rodríguez cualificou este dato como “positivo e indicativo do bo traballo que está a realizar a Garda Civil no territorio”, aínda que insistiu na necesidade de manter a vixilancia, especialmente ante casos de violencia de xénero.
Tamén se avaliaron os resultados dos plans operativos da Secretaría de Estado de Seguridade. No marco do Plan Director, a Garda Civil impartiu 34 charlas nos centros educativos locais. Abordáronse cuestións como acoso escolar, ciberacoso, adicións ou seguridade viaria. O Plan Maior tamén chegou á Casa da Cultura cunha sesión o pasado febreiro.•
Cargando ...
