Xaime Cortizo inaugura en Sober unha mostra sobre a relación entre arte e paisaxe

O fotógrafo e viticultor Xaime Cortizo inaugurou este venres 13 de xuño, no Centro Sociocultural de Sober, a exposición Viaxe interior de Pedra e Auga, aberta ao público ata o 31 de xullo. A mostra ofrece un percorrido visual por tres paisaxes significativas para o autor: Santiago de Compostela, a Ribeira Sacra e a costa atlántica. A través da pedra e da auga como símbolos, Cortizo convida a reflexionar sobre a transformación interior e o vínculo emocional co territorio. “Habitar a paisaxe é tamén facelo coa memoria e coa alma”, sinala. A súa experiencia na viticultura está presente na mirada pausada que caracteriza a serie. Con traxectoria consolidada na fotografía artística e documental, Xaime Cortizo propón unha exposición que convida a deterse, contemplar e sentir. Unha obra que nace da terra, da auga, do tempo… e do invisible. A entrada é gratuíta para todas as persoas interesadas en descubrir esta proposta.•