La Vuelta contará cunha achega de 100.000 euros da Deputación de Lugo e terá como protagonistas a Montaña e a Ribeira Sacra, cun destacado impacto económico e promocional para o territorio
A cidade de Monforte de Lemos acollerá o próximo 7 de setembro a meta da etapa 15 de La Vuelta 2025, unha das probas ciclistas máis prestixiosas do calendario internacional. Así o anunciaron este luns o presidente da Deputación de Lugo e alcalde de Monforte, José Tomé Roca, e o director de La Vuelta, Javier Guillén, durante a presentación oficial celebrada na Casa Consistorial da localidade.
O tramo lucense desta edición atravesará nove municipios da provincia: A Fonsagrada, Baleira, Castroverde, O Corgo, Láncara, Sarria, O Incio, Bóveda e finalmente Monforte, onde rematará unha xornada que se anticipa longa, esixente e cunha gran visibilidade mediática. A Deputación de Lugo contribuirá con 100.000 euros ao financiamento do evento, que este ano terá como referentes principais os escenarios naturais da Montaña e da Ribeira Sacra.
“Que Monforte volva ser final de etapa nun evento do prestixio de La Vuelta non é casualidade. É o resultado dunha aposta firme e sostida da Deputación de Lugo polo deporte como motor de promoción territorial e desenvolvemento económico”, afirmou Tomé Roca.
O mandatario provincial resaltou que esta nova presenza de Lugo no percorrido da carreira é froito dun traballo continuado de patrocinio e colaboración institucional, que permite consolidar a imaxe da provincia como un referente habitual nesta cita deportiva de alcance mundial.
A etapa 15, segundo explicou o presidente da Deputación, discorrerá por unha gran diversidade paisaxística, desde os altos da montaña ata os vales da Ribeira Sacra, ofrecendo unha ampla mostra da riqueza natural e patrimonial do territorio lucense. “Será unha etapa longa e esixente, que discorrerá por paisaxes espectaculares antes de rematar aquí, en Monforte.
Un percorrido que non só poñerá a proba a resistencia dos ciclistas, senón que tamén amosará ao mundo a beleza e a diversidade da nosa provincia”, destacou.
Ademais do impacto deportivo, Tomé puxo o foco no retorno económico e promocional que supón para a provincia acoller unha etapa de La Vuelta. “Mobiliza a máis de 3.000 persoas entre organización, equipos e medios. Só en impacto económico directo, segundo informes técnicos, esta etapa pode xerar máis de 1,9 millóns de euros, e un retorno total superior aos 3 millóns. E isto sen contar o incalculable valor promocional de máis de tres horas de retransmisión televisiva en 190 países, cunha audiencia global de arredor de 400 millóns de persoas”, apuntou.
Neste sentido, o alcalde de Monforte fixo fincapé na oportunidade que representa esta cita para dar a coñecer a nivel internacional o patrimonio, a cultura e o modo de vida da provincia de Lugo. “Vese a nosa identidade, a nosa cultura, a nosa forma de vivir. Vese a provincia de Lugo como destino turístico sostible, de calidade, respectuoso co medio ambiente e cheo de experiencias auténticas”, subliñou.
Tomé Roca encadrou esta acción dentro dunha estratexia máis ampla de promoción do territorio. “A presenza de La Vuelta aquí é unha acción estratéxica de promoción turística, un investimento que reforza a nosa marca territorial. E facémolo tamén pensando na xente: porque queremos que este evento implique á veciñanza, que sexa un motivo de orgullo colectivo, e tamén unha oportunidade para a nosa hostalería, o noso comercio e os nosos pequenos negocios”, indicou. E concluíu o Alcalde de Monforte cunha mensaxe de confianza: “Este 7 de setembro, volveremos facer historia”.
Pola súa banda, Javier Guillén, director da proba, tamén quixo destacar o valor desta etapa no conxunto do calendario da Vuelta 2025. “A etapa 15 é un 7 de setembro e unha etapa de domingo, algo moi importante para o seguimento in situ ou popular que poida ter”, sinalou. Guillén explicou que será unha etapa moi esixente desde o primeiro momento. “Ten dous portos de montaña desde o seu inicio, 170 quilómetros nos que non hai un só metro chan. Pódese pensar que é unha etapa para os sprinters, pero coa carga de cansazo e co terreo que temos será unha etapa emocionante e aposto que gañará un grupo reducido de corredores”, avanzou.
Á presentación tamén asistiu o concelleiro de Deportes de Monforte, José Manuel Mougán, quen puxo en valor a implicación do Concello para que a cidade sexa escenario dunha das metas máis esperadas da competición.•
Cargando ...
