A Feira Outrora de Rubián xa ten cartel para a súa XXI edición, que se celebrará o 14 de xullo

O Concello de Bóveda anunciou o cartel gañador da XXI Feira Tradicional Outrora, que se celebrará o domingo 14 de xullo en Rubián. A autora é a viguesa Nina Rodríguez Rodríguez, que repite galardón tras vencer tamén na edición anterior. Nesta ocasión, presentou unha obra ao óleo sobre táboa de madeira, na que representa a esencia da feira e a paisaxe da Ribeira Sacra. O premio está dotado con 400 euros. Ao certame de carteis deste ano presentáronse unha ducia de propostas procedentes da comarca de Lemos, doutros puntos de Galicia e do resto do Estado. A Feira Outrora é unha recreación histórica que transforma Rubián nun espazo de feira tradicional galega, con postos de artesanía, gastronomía, música e oficios antigos. O evento celébrase no entorno da capela do Ecce Homo e nas rúas próximas, e os asistentes son convidados a acudir con vestimenta de época. A autora do cartel, licenciada en Belas Artes, conta cunha ampla traxectoria en pintura e ilustración, e destacou pola súa capacidade para captar a identidade cultural do evento •