A cidade de Monforte acolleu este venres un foro centrado na candidatura da Ribeira Sacra a Patrimonio Mundial da UNESCO, no que participaron representantes institucionais, expertos en patrimonio e axentes do territorio. O encontro serviu para analizar o momento actual do proceso e os retos que afronta esta proposta, que aspira a obter o recoñecemento internacional en xuño de 2026.
O presidente da Deputación de Lugo e alcalde de Monforte, José Tomé Roca, destacou que a Ribeira Sacra “ten un patrimonio humano, cultural e natural dun valor incalculable” e sinalou que o recoñecemento da UNESCO sería “un paso histórico para a comarca e para toda a provincia”. Tamén puxo en valor o papel da Deputación na recuperación da candidatura hai máis dunha década. Tomé Roca tamén puxo o foco nun dos aspectos que singulariza esta candidatura: a relación entre a Ribeira Sacra e a auga, como elemento vertebrador da paisaxe, da economía e da cultura. O conselleiro de Cultura, Lingua e Xuventude, José López Campos, subliñou os “atributos excepcionais” da proposta, centrada na relación entre a paisaxe e a auga, e lembrou que consultores da UNESCO visitarán o territorio en outubro. “Estamos convencidos do valor deste territorio e confiamos en que acade o merecido recoñecemento”, afirmou.
A candidatura, que abrangue 26 concellos das provincias de Lugo e Ourense, destaca pola súa paisaxe fluvial, o patrimonio hidráulico e a integración da auga como elemento vertebrador. A Xunta leva investidos preto de 8 millóns de euros en máis de 90 actuacións de conservación e posta en valor de bens patrimoniais. López Campos agradeceu a implicación da veciñanza, institucións e expertos, e destacou o apoio do embaixador de España ante a UNESCO, Miquel Iceta, ao longo de todo o proceso.•
Cargando ...
