A conselleira de Economía e Industria, María Jesús Lorenzana, avanzou este xoves en Ribeira que o Diario Oficial de Galicia publicará o vindeiro 30 de xuño a nova convocatoria do Plan MOVES III 2025. Trátase dun programa estatal cofinanciado polo Mecanismo de Recuperación e Resiliencia (MRR) que ofrece axudas para a adquisición de vehículos eléctricos e a instalación de puntos de recarga, cun orzamento de 19,6 millóns de euros na nova edición.
TERCEIRA EDICIÓN DO PLAN MOVES
Durante a súa visita á VI Feira do Automóbil Híbrido e Eléctrico, a conselleira lembrou que as tres edicións do MOVES suman en Galicia máis de 54 millóns de euros de orzamento e 13.743 solicitudes, cun volume total de axudas solicitadas que supera os 73 millóns.
Lorenzana lamentou que o Goberno central non atendera as peticións das comunidades e do sector para substituír o MOVES III por unha cuarta edición que mellore o modelo actual. Neste sentido, puxo en valor o plan galego Renova o teu vehículo, financiado con fondos propios da Xunta, que “ten o apoio do sector porque permite un desconto directo na factura de compra e evita atrasos no cobro”.
ESTIMULAR A DEMANDA DE VEHÍCULOS EFICIENTES
A última convocatoria deste programa, lanzada en xaneiro, esgotou os fondos —3,17 millóns— en mes e medio, cun total de 1.491 solicitudes por un importe de 3,32 millóns, que mobilizaron preto de 33,5 millóns en investimento.
A titular de Economía asegurou que a Xunta seguirá impulsando medidas para estimular a demanda de vehículos eficientes, traballando da man dos concesionarios.•
Cargando ...
