Sarria volveu vestir de cor e tradición coas alfombras florais do Corpus, que transformaron a Rúa Maior nun lenzo efémero. Máis de medio cento de persoas participaron na elaboración dos tapices, deseñados por cinco artistas con vencellos á localidade. Hernando Caldeiro, Marcos Martínez e María Beltrán repetiron nesta edición, mentres que Cristina Amil e María Boquera se sumaron por primeira vez, achegando a súa visión desde Valencia.
Este ano, os deseños homenaxearon Sarria a través de símbolos e monumentos locais. As alfombras luciron diante das igrexas de Santa Mariña e San Salvador e na parte alta da rúa. O traballo preparatorio prolongouse durante días na capela do Perpetuo Socorro.. Ademais de flores achegadas por veciños e floricultores, empregáronse materiais como mirto, serrín e virutas tinguidas.
A celebración litúrxica tivo lugar o domingo en San Salvador, con misa cantada pola Coral Polifónica e procesión acompañada pola Banda de Sarria.•
Cargando ...
