Monforte de Lemos e Sober serán escenario esta fin de semana do Encontro Nacional de Emprendedores Creativos, unha iniciativa promovida pola Asociación España Creativa e a Rede de Cidades e Territorios Creativos de España (RECITCREA) no marco do proxecto Camiño Creativo de Santiago 2025. A presentación do programa tivo lugar este martes 24 de xuño, nun acto no que participaron a tenente de alcalde monfortina, Gloria Prada, e a presidenta de España Creativa, Belén Elisa Díaz.
EMPRENDEMENTO CREATIVO
Segundo explicou Gloria Prada, o obxectivo do evento é fomentar o emprendemento cultural e creativo como ferramenta de transformación social e económica, especialmente en territorios como a Ribeira Sacra, “onde se conxugan patrimonio, cultura, paisaxe, auga e gastronomía”. A representante do goberno local destacou que o alcalde de Monforte, José Tomé, apoiou a proposta desde o primeiro momento, destinando unha achega municipal de 5.000 euros para contribuír ao desenvolvemento do encontro.
ENTREGA DOS PREMIOS ESPAÑA CREATIVA – REDE ELÉCTRICA
A programación estenderase durante catro días e combinará foros profesionais, mesas de debate, actividades formativas, visitas culturais, experiencias no territorio e unha gala final de entrega dos Premios España Creativa – Rede Eléctrica. O evento, que terá como sedes principais Monforte e Sober, arrancará de xeito informal o xoves 26 cun encontro de participantes no Miradoiro de Cadeiras, onde terá lugar un recital da poeta Olga Novo e un catering de benvida.
FOROS PROFESIONAIS NO PARADOR DE MONFORTE
A inauguración oficial celebrarase o venres 27 ás 10 da mañá no Parador de Monforte, que tamén acollerá os cinco foros profesionais nos que se debaterán temas como a cooperación entre institucións, a sustentabilidade dos proxectos culturais, o financiamento das industrias creativas, o turismo cultural innovador ou o papel das artes e a creatividade no medio rural. Está prevista a participación de representantes de espazos de creación, empresas, redes culturais, administracións públicas e colectivos cidadáns.
PERCORRIDO TURÍSTICO POLA RIBEIRA SACRA
A xornada do domingo 29 estará centrada nas “vivencias no territorio”, cun percorrido pola Ribeira Sacra que inclúe visitas a adegas tradicionais, unha ruta polo románico e unha travesía en catamarán, coa intención de conectar cultura, paisaxe e comunidade.
Durante a presentación, Belén Elisa Díaz puxo en valor o compromiso do municipio co emprendemento cultural e agradeceu a implicación do goberno local. Pola súa banda, Gloria Prada salientou que encontros como este “serven para recoñecer e potenciar o talento local e para reforzar a identidade da Ribeira Sacra como territorio creativo, innovador e con futuro”.
VOLUNTADE DE CONTINUIDADE COMO ESPAZO DE REFLEXIÓN
A vocación do evento é consolidarse como un espazo anual de reflexión e acción arredor da cultura como motor de rexeneración territorial. A súa celebración en Monforte de Lemos e Sober aspira a visibilizar o potencial das contornas non urbanas para albergar proxectos innovadores, favorecer sinerxías e dinamizar a economía a través da creatividade.•
Cargando ...
