A Xunta continúa a súa aposta pola innovación e o emprendemento tecnolóxico cunha nova convocatoria das axudas dirixidas ás Iniciativas Empresariais de Base Tecnolóxica (IEBT), prevista para os vindeiros días. Esta liña de apoio, xestionada pola Axencia Galega de Innovación, ten como obxectivo fomentar a creación e consolidación de empresas innovadoras de recente creación na comunidade. Desde a súa posta en marcha en 2021, estas axudas permitiron mobilizar máis de 7 millóns de euros, beneficiando a 27 empresas con vocación de crecemento. As empresas que obteñan a cualificación como IEBT poden acceder a diferentes modalidades de apoio económico. Entre elas, destacan as subvencións á creación de emprego estable, cunha contía base de 6.000 € por posto de traballo indefinido, que pode alcanzar os 12.000 € no caso de persoas con doutoramento. Tamén se contempla unha axuda para o inicio da actividade, que pode chegar ata os 24.000 €, dependendo do número de empregos xerados. Ademais, inclúense incentivos para a conciliación da vida persoal e laboral das persoas promotoras, cunha cobertura do 75 % dos custos de coidado de menores ou dependentes, ata un máximo de 3.000 €. A Xunta tamén ofrece apoio á función xerencial, cunha subvención de ata 10.000 € para servizos de formación e asesoramento. Estas medidas buscan consolidar un ecosistema empresarial baseado no coñecemento e na innovación. “Contribuímos ao fortalecemento do emprendemento innovador e á transferencia de coñecemento desde os organismos de investigación”, sinalou o conselleiro Román Rodríguez.•
Cargando ...
