A campaña “Iguais en dereitos, obrigacións e oportunidades”, que desenvolve a Xunta, pon o foco na iguadade de xénero en calquera momento da vida, co feminismo como eixo fundamental
A necesidade de avanzar cara unha sociedade realmente igualitaria en dereitos e obrigacións pasa por incidir en políticas de igualdade de xénero en todos os contextos e etapas da vida. Dende a infancia ata a idade adulta, tanto en entornos de coidados familiares como de reparto de tarefas domésticas, as persoas precisamos construír o noso proxecto vital sen fendas de xénero. Este desafío abrangue tamén ao ámbito das profesións, polo que cómpre implicar a toda a sociedade nun esforzo conxunto para acabar con estas limitacións.
FAMILIAS CORRESPONSABLES, A BASE DUNHA SOCIEDADE SEN DISCRIMINACIÓNS
Nesta liña, a administración está a desenvolver unha nova iniciativa de sensibilización. Baixo o lema “Iguais en dereitos, obrigacións e oportunidades”, a Xunta de Galicia busca concienciar e sensibilizar á cidadanía de que a erradicación da desigualdade de xénero é unha labor de todas e de todos, polo que cómpre empezar dende o que temos máis cerca. A campaña amosa situacións cotiás na vida de mulleres e homes en momentos de corresponsabilidade efectiva, que ten que ver co coidado de fillos e fillas ou de maiores dependentes, tarefas que tradicionalmente estaban vencelladas de xeito exclusivo ás mulleres.
Esta campaña dá continuidade a programas e medidas que a Xunta de Galicia está a desenvolver ao longo do ano, en colaboración con entidades sociais e concellos. Con estas accións, preténdese favorecer, impulsar e promover unha igualdade real, efectiva e práctica, onde o feminismo actúa como movemento que trata de reducir a fenda de xénero aínda existente en moitos ámbitos da sociedade.
As familias corresponsables reparten entre homes e mulleres a carga física e mental que supoñen os coidados a menores e a maiores dependentes
Por este motivo, un dos principais factores nos que se basan estas políticas é o necesario fomento da corresponsabilidade, xa que toca ao corazón do dinamismo social, que é a igualdade efectiva no ámbito familiar. Neste sentido, a Xunta leva anos impulsando programas específicos que fomenten un cambio de tendencia, estimulando que máis homes soliciten a redución de xornada para coidar a fillos e fillas ou maiores dependentes, permitindo que as mulleres non teñan que condicionar a súa carreira profesional. Así mesmo, a Xunta apoia accións de conciliación impulsadas por concellos, entidades de iniciativa social e ANPAS. Por último, as políticas de conciliación da Xunta converten a Galicia en referencia neste eido, coa gratuidade das escolas infantís, o bono concilia ou a rede de casas niño e do maior en concellos do rural •
Cargando ...
