A nova edición da Noite Meiga foi presentada a pasada semana en Sarria nun acto no que participaron o vicepresidente da Deputación de Lugo, Efrén Castro, o delegado territorial da Xunta de Galicia en Lugo, Javier Arias, o concelleiro de Cultura, César No e representantes da asociación Meigas e Trasgos. A festa, que aspira á declaración de interese turístico, celebrarase os días 29, 30 e 31 de agosto cunha programación que mestura música tradicional, simbolismo e participación cidadá. O venres abrirase co tradicional percorrido con fachos e concertos de Xabier Díaz e Adufeiras de Salitre, Mondra e DJ Russ. O sábado terá lugar o pregón, a cea popular e o espectáculo central: a danza da Noite Meiga, que representa a loita entre o ben e o mal e o poder purificador do lume. Actuarán tamén a Banda de Música da Comarca de Sarria e D’Crooners Band. O domingo estará centrado na cativada, coa Tardiña Meiga, obradoiros e xogos. O comercio local implicarase coa campaña “Eu son Noite Meiga”, recollendo desexos que serán queimados pola meiga maior. O cartel deste ano está inspirado na obra de Castelao.•
Cargando ...
