Chantada mellora a sinalización turística nos accesos ao Monte do Faro

O Concello de Chantada vén de reforzar a sinalización dos recursos turísticos situados nos accesos ao Monte do Faro coincidindo co inicio da tempada estival. Os novos sinais, colocados nas estradas LU-P-1002 e LU-213, identifican lugares de interese como a igrexa de Santiago de Requeixo, a ermida da Nosa Señora do Faro e o propio miradoiro do Faro, recentemente recoñecido como miradoiro Starlight.
O alcalde, Manuel Lorenzo Varela, sinalou que con esta actuación se busca mellorar a accesibilidade a “un punto estratéxico, miradoiro natural e paso do Camiño de Inverno”. Precisamente durante os meses de verán increméntase o número de peregrinos que chegan á vila seguindo esta ruta xacobea.
O itinerario permite descubrir a diversidade paisaxística e patrimonial do municipio: desde a ribeira do Miño en Belesar ata os altos do Faro, os camiñantes atravesan pazos, igrexas, cruceiros e núcleos históricos. “En Chantada o peregrino atopa servizos, beleza e historia”, afirmou Lorenzo Varela.•