O Fancine de Lemos afronta esta fin de semana a recta final da súa undécima edición, marcada polo relevo na dirección do certame. Anabel Soto colle o testemuño de Carlao e Iván tras unha década de consolidación do festival como referente do cinema fantástico en Galicia. A nova etapa aposta polo formato curto como espazo de risco e creatividade, mantendo o acceso libre a todas as actividades.
Este venres, ás 11.30 horas, a Casa da Cultura de Monforte acollerá unha sesión de cinema infantil coa proxección de Jumanji, organizada en colaboración coa asociación Ágora. Ás 18.30, continuará a competición oficial de curtametraxes, na que participan 26 obras procedentes de distintos países.O ciclo Sharksploitation, centrado en filmes inspirados en Tiburón, inclúe a proxección de Sharkansas o venres e The Host, do surcoreano Bong Joon-ho, o sábado. Ambas as sesións comezarán ás 20.30 horas.
A clausura do festival terá lugar o sábado á mesma hora, cun acto no que se darán a coñecer as curtas premiadas e se exhibirán as obras gañadoras.
Cargando ...
