A gandaría Puluan, situada en Monforte de Lemos, mellorará a súa planta de procesamento de leite grazas ao apoio económico recibido a través das axudas da Xunta de Galicia para proxectos empresariais non agrícolas en zonas rurais. A conselleira do Medio Rural, María José Gómez, visitou esta semana as instalacións acompañada de responsables da área e do titular da explotación, Antonio Francisco López.
Esta explotación é unha das 56 beneficiarias da última convocatoria destas achegas, dotada con 2,1 millóns de euros, e permitirá a adquisición de novo equipamento para o procesado lácteo, así como melloras no espazo destinado á promoción dos produtos. No conxunto da convocatoria, vinte proxectos céntranse na transformación agroalimentaria, contribuíndo á consolidación de 552 empregos e á creación de 56 novos postos de traballo.
Con 269 cabezas de gando, Gandaría Puluan combina produción e transformación, o que lle permite engadir valor ao produto final. Entre as iniciativas máis singulares atópase a elaboración dun queixo macerado con viño Mencía da Denominación de Orixe Ribeira Sacra. “Trátase dun exemplo de innovación que amosa o potencial do sector primario galego e a súa conexión co territorio”, indicou a conselleira.
Ademais deste apoio, a granxa contou con fondos Leader para impulsar tres proxectos diferenciados. O máis recente, vinculado á convocatoria de 2024, serviu para adaptar as instalacións co fin de acoller visitas guiadas, actividades de divulgación e accións promocionais, cun investimento de 70.151 euros.
Tamén adquiriu un vehículo con caixa isoterma para a distribución directa de leite fresco pasteurizado e incorporou un robot arrimador de comida fotovoltaico, así como un sistema de xeración de enerxía solar. A estas iniciativas súmanse outras axudas públicas destinadas á comercialización de produtos agrarios, renovación de maquinaria e liñas da Política Agraria Común.•
Cargando ...
