A Consellería do Medio Rural activará nos vindeiros meses os primeiros catálogos parciais de solos agropecuarios e forestais de Galicia, que terán como ámbito de actuación a comarca do Val de Lemos. Así o anunciou a conselleira María José Gómez nun encontro celebrado esta semana con representantes municipais de Bóveda, Monforte, Pantón, A Pobra do Brollón e Sober, no que tamén participou a directora xeral da Axencia Galega de Desenvolvemento Rural, Paz Rodríguez.
A iniciativa, que segundo Gómez terá carácter pioneiro en Galicia, nace coa finalidade de recuperar terra agraria nunha comarca onde conflúen diversos factores que dificultan o aproveitamento do territorio. A fragmentación da propiedade, o abandono progresivo da actividade agraria ou a presenza de plantacións en solos de alta aptitude produtiva son algúns dos elementos que limitan o rendemento das superficies regables do Val de Lemos.
Neste contexto, os catálogos parciais, previstos na Lei de recuperación da terra agraria de Galicia, permitirán establecer unha base técnica e legal para ordenar os usos do solo rústico. Estes documentos servirán de apoio a procesos como a mobilización de terras, a creación de polígonos agroforestais, a declaración de zonas de actuación prioritaria ou a concesión de incentivos e axudas. Serán ferramentas dinámicas, suxeitas a revisións periódicas e baseadas na análise de factores físicos, ambientais e socioeconómicos, co obxectivo de garantir que cada uso produtivo se desenvolva nos terreos máis adecuados.
A Xunta tamén inclúe no orzamento de 2025 unha partida de 600.000 euros para mellorar as infraestruturas vinculadas ao regadío nesta comarca, evidenciando así o seu compromiso co futuro do sector primario na comarca de Lemos.•
Cargando ...
