Pantón pon en marcha o seu Verán Cultural con deporte, música e campamentos

O Concello de Pantón activa esta fin de semana o programa do Verán Cultural, que se prolongará ata finais de agosto. A primeira actividade será o Trail Heroica Sacra, unha proba deportiva que se celebra entre o venres 11 e o domingo 13 de xullo, organizada polo club Galaico Trail Run e a peña Saltasebes coa colaboración do Concello.
O sábado ábrese a tempada da Piscina Municipal, que manterá horario de 13:00 a 21:00 horas todos os días. O domingo, ás 19:00 horas, terá lugar no Mosteiro Cisterciense o concerto de Peitoescuro, co que se inauguran as 36 Xornadas da Rota do Románico.
Do 1 de xullo ao 29 de agosto desenvolveranse os Campamentos de Verán, nos que participarán máis de 70 nenos e nenas. Ademais, cada venres de xullo haberá actuacións musicais ou espectáculos na Praza do Concello, con citas como o concerto de Carta de Ajuste (día 4), “Fire Performance” (día 11) ou Son de Boleros (día 18). O Festival 17º Ribeira Sacra pasará polo Pazo de Ferreiroá o día 20.•