Na Casa da Cultura de Quiroga concluíu o pasado mércores o curso “Atención Hixiénico Sanitaria para Persoas Dependentes”, no que participaron máis de trinta mulleres con cargas familiares derivadas dos servizos sociais municipais.
FUNDACIÓN
MARÍA JOSÉ JOVE
A formación, organizada pola Fundación María José Jove, a Xunta e o Concello de Quiroga, enmárcase no programa FOADOM, que busca capacitar mulleres do rural galego para traballar na axuda a domicilio, un sector cunha alta demanda laboral.
Este programa gratuíto ten por obxectivo incrementar a autonomía laboral, social e persoal das participantes, mellorar a súa empregabilidade e favorecer a intermediación coas entidades que prestan servizos de atención domiciliaria nas zonas rurais.
O curso, de carácter teórico-práctico e homologado, tivo unha duración intensiva e impartíuse en horario de tarde na Casa da Cultura. Segundo o concelleiro de Servizos Sociais, Xosé Manuel Fernández, esta formación “permite adquirir ferramentas para desempeñar un traballo esixente como o coidado de persoas dependentes”.
O equipo técnico de FOADOM analiza individualmente cada candidatura, valorando o perfil e as necesidades sociais, educativas e persoais, para garantir unha resposta adaptada ás realidades das mulleres participantes. Ademais, o programa contribúe a ampliar o número de profesionais cualificados no sector da axuda a domicilio en Galicia.•
Cargando ...
