As achegas van dirixidas a familias con crianzas de ata 3 anos ou de ata 12 con discapacidade recoñecida
O Diario Oficial de Galicia publicou a convocatoria de axudas dirixidas a persoas que reduzan a súa xornada laboral para atender a fillas e fillos de ata 3 anos, ou de ata 12 no caso de ter recoñecida unha discapacidade igual ou superior ao 33 %. A Xunta destina 620.000 euros a este programa, financiado nun 60 % pola Unión Europea a través do FSE+ Galicia 2021-2027.
As contías oscilan entre 1.700 e 3.700 euros, segundo o grao de redución da xornada e o número de menores a cargo. O prazo de solicitude remata o 14 de agosto, e o período subvencionable abrangue do 1 de agosto de 2024 ao 31 de xullo de 2025, cun máximo de oito meses.
A Xunta salienta que estas achegas pretenden avanzar na igualdade, promovendo unha distribución máis equilibrada dos coidados entre homes e mulleres. A finalidade desta orde de axudas é fomentar a corresponsabilidade entre mulleres e homes, apostando por conseguir un cambio de tendencia e avanzar cara unha conciliación corresponsable. Con elas, búscase chegar a un maior equilibrio no reparto dos tempos das tarefas dos coidados e, deste xeito, favorecer a empregabilidade e a promoción profesional das mulleres.
As axudas abranguen todo tipo de familias, incluídas as monoparentais, monomarentais, do mesmo sexo ou de distinto sexo.•
Cargando ...
