A iniciativa, que busca fomentar o turismo fóra da tempada alta, permite desfrutar de descontos ata o Nadal en máis de 270 empresas galegas
Foto GPXG.
A Xunta de Galicia logrou esgotar en apenas 60 horas os 16.666 bonos turísticos postos en circulación para este outono, dentro dunha iniciativa que busca consolidar a desestacionalización do turismo e garantir a súa rendibilidade ao longo de todo o ano. A medida, impulsada por Turismo de Galicia, mobilizará un total de 2,5 millóns de euros no sector, cun investimento público de 1 millón.
BONOS FINANCIADOS NUN 40% POLA XUNTA
Cada bono, cun valor de 150 euros, está cofinanciado nun 40% pola Xunta e nun 60% polos usuarios. A súa descarga estivo dispoñible desde o venres 18 de xullo na web oficial www.bonoturismo.gal, e en só tres horas xa foran descargados 7.000. O ritmo mantívose durante a fin de semana, acadando as 14.166 descargas o sábado pola mañá e completándose o domingo ás 21:00 horas.
OS BONOS PODERÁN EMPREGARSE ATA O 25 DE DECEMBRO
Os bonos poderán empregarse entre o 15 de setembro e o 25 de decembro en establecementos e servizos turísticos adheridos, que a día de hoxe suman 271 en toda a comunidade. O prazo para que novas empresas se unan ao programa continúa aberto ata o 1 de decembro. Para participar, deben estar dadas de alta no Rexistro de Empresas e Actividades Turísticas (REAT) e contar cun centro de traballo en Galicia.
O director de Turismo de Galicia, Xosé Merelles, destacou no Parlamento que “a análise dos datos confirma un crecemento equilibrado e sostible do turismo galego”, con aumentos de viaxeiros nos primeiros meses do ano e unha redución progresiva do peso do verán na demanda total. “Estamos a deseñar unha oferta turística que respecte o territorio e beneficie aos residentes”, sinalou.
A Xunta aposta tamén por outras accións complementarias como os Trens Turísticos, o Outono Gastronómico ou a Primavera de Portas Abertas, todas elas fóra da tempada alta.•
Cargando ...
