O Consorcio de Turismo da Ribeira Sacra vén de poñer en marcha unha nova edición do seu servizo de lanzadeiras gratuítas para a tempada alta, coa incorporación dunha cuarta ruta que conectará Chantada co embarcadoiro de Belesar e a Praia da Cova. Esta medida busca facilitar o acceso aos principais recursos turísticos da zona e reducir a presión do tráfico rodado en puntos con escasa capacidade de estacionamento.
As lanzadeiras estarán operativas entre o 19 de xullo e o 31 de agosto, coincidindo co período de maior afluencia de visitantes. A nova liña súmase ás xa existentes entre Escairón e a Praia da Cova, Monforte de Lemos e o embarcadoiro de Ponte do Sil, e Castro Caldelas co embarcadoiro de Abeleda. Todas elas están deseñadas para dar servizo ás rutas fluviais polos ríos Sil e Miño, que ofertan máis de mil prazas diarias.
PRAIA DA COVA NO SAVIÑAO
A Praia da Cova, un dos espazos fluviais máis concorridos do verán, contará así con dobre conexión: desde Escairón e agora tamén desde Chantada. “Queremos garantir un acceso ordenado e sostible aos recursos máis demandados”, sinalan desde o Consorcio, que recomenda reservar praza con antelación a través da súa web oficial.
O financiamento do servizo, que ata o pasado xuño dependía do Plan de Sostibilidade Turística, continuará este verán grazas a un convenio coa Axencia de Turismo de Galicia. Pola súa banda, o concello de Parada de Sil mantén activo o servizo de lanzadeira obrigatorio ao mosteiro de Santa Cristina, cun custo de 3 euros que inclúe a entrada ao monumento.
OCUPACIÓN TURÍSTICA NO MES DE XUÑO
A ocupación turística na Ribeira Sacra acadou en xuño o 50%, unha cifra que, malia ser lixeiramente inferior á doutros anos, supón o mellor rexistro histórico en número de prazas ocupadas, debido ao aumento da oferta de aloxamento.•
Cargando ...
