A Asociación de Empresas Ribeira Sacra Next vén de asinar un novo convenio de colaboración coa Asociación de Empresarios de Mos (AEMOS) que permitirá ás compañías asociadas acceder á tecnoloxía INSERE, unha plataforma dixital especializada na xestión de emprego. O acordo rubricouse nas instalacións da adega Regina Viarum entre o presidente de AEMOS, Manuel Castro, e o secretario de Ribeira Sacra Next, Severino Rodríguez.
O convenio, con vixencia de dous anos, establece un marco de cooperación para o uso compartido desta ferramenta tecnolóxica e para o desenvolvemento de accións formativas, de intermediación laboral e de dixitalización orientadas a dinamizar o emprego e fomentar o desenvolvemento socioeconómico nas dúas comarcas. As actividades previstas incluirán tamén encontros empresariais e obradoiros prácticos para mellorar a inserción laboral.
Ribeira Sacra Next poderá implementar unha solución tecnolóxica avanzada sen necesidade de comezar desde cero, canalizando recursos cara a unha mellor captación e retención de talento, así como á detección das necesidades formativas e profesionais do territorio. A plataforma permitirá acadar un coñecemento preciso da demanda laboral da comarca.
O acordo súmase a outros xa asinados pola asociación con A Túa Xanela, Caixabank, Gasóleos Monforte e Nordés Club Empresarial da Coruña. AEMOS, pola súa banda, reforza o posicionamento da plataforma INSERE como referente interterritorial, accedendo a novos espazos de colaboración e intercambiando. •
Cargando ...
