A aldea dos Anguieiros, na parroquia de Montefurado, celebrou esta fin de semana a Madalena 2025 cunha programación que combinou natureza, tradición e gastronomía. O sábado 19 comezou cunha andaina circular entre Alvaredos e Roblido, cun percorrido de dificultade media-baixa. A ruta, de entre 7 e 8 quilómetros, permitiu aos participantes descubrir a contorna natural e arquitectónica da zona, incluíndo a aldea de Roblido, no concello da Rúa, coñecida pola súa vitalidade demográfica. Pola tarde, a programación continuou con xogos populares e interxeracionais, como a billarda, os bolos ou a chave, seguidos dunha merenda popular amenizada polo grupo Érbedo de Sober. Un dos momentos máis destacados foi a recuperación do Concurso de Madalenas, no que se valoraron presentación, sabor e orixinalidade. As madalenas participantes foron posteriormente degustadas polo público asistente.
O domingo 20 celebrouse o XIII Campionato de Bolos, que contou cunha ampla participación e premios para os mellores xogadores. A xornada continuou cunha alborada a cargo do grupo Abertal, da Rúa, e coa tradicional misa e procesión na honra da Madalena.•
Cargando ...
