O Descenso Urbano Vila de Sarria celebrarase esta fin de semana con dúas xornadas de espectáculo deportivo nas rúas da vila. O xoves 25 terá lugar o DIRT, unha proba de saltos e acrobacias na rúa Marqués de Ugena, mentres que o venres 26 disputarase o DHU, nun circuíto urbano que vai desde o Campo da Feira ata O Malecón. O evento, organizado polo club ciclista DH Galicia desde 2012, conta coa colaboración da área de Deportes da Deputación de Lugo, da Xunta de Galicia e do Concello de Sarria.
O vicepresidente provincial, Efrén Castro, destacou “o traballo do club na organización e na promoción desta proba, que converteu Sarria nun referente estatal do descenso urbano”. Ademais das competicións, o programa inclúe concertos, gastronomía e humor, convertendo a cita nun evento multidisciplinar que atrae tanto a afeccionados ao deporte como a público familiar. A organización prevé unha alta participación e afluencia de público, consolidando o evento como unha das citas máis destacadas do verán deportivo na comarca. O circuíto, con máis de cen módulos de madeira, é considerado un dos máis espectaculares do Estado.•
Cargando ...
