O presidente da Deputación de Lugo, José Tomé Roca, participou o pasado venres nun almorzo informativo celebrado na sede do Círculo de Empresarios de Galicia en Vigo, no que interveu o presidente da Generalitat de Cataluña, Salvador Illa. O acto contou tamén coa presenza do alcalde de Vigo, Abel Caballero, e doutras autoridades institucionais e representantes do tecido económico e social.
Durante a súa intervención, Illa expuxo a súa proposta de financiamento autonómico, que permitiría a Cataluña xestionar impostos como o IRPF, mantendo a súa contribución á solidariedade interterritorial. Defendeu que se trata dun modelo exportable a outras comunidades e afastado da confrontación política. “Compartir a prosperidade fainos máis competitivos, máis fortes e máis xustos”, afirmou.
O presidente catalán destacou os vínculos históricos e culturais entre Galicia e Cataluña, e apelou a “construír pontes de consenso” para superar a crispación política. Tamén lamentou que Galicia non se sumase á petición conxunta para solicitar a oficialidade das linguas cooficiais na Unión Europea, e comprometeuse a seguir traballando nese obxectivo.
Illa insistiu na necesidade de establecer un diálogo racional e sen prexuízos sobre o modelo territorial e económico do Estado, e sinalou que “Galicia e Cataluña poden liderar xuntas un novo tempo de entendemento e cooperación”.•
Cargando ...
