O festival 17º Ribeira Sacra pecha edición con máis de 3.000 asistentes e un impacto económico superior ao millón de euros

A novena edición do festival 17º Ribeira Sacra celebrouse entre o 18 e o 20 de xullo cunha programación que combinou concertos en espazos singulares, experiencias arredor do viño e actividades culturais que reuniron a máis de 3.000 persoas. O evento, que tivo como escenarios principais os concellos de Sober e Monforte, contou cun cartel encabezado por Julieta Venegas, The Jayhawks, Ángel Stanich ou Exsonvaldes. A organización, a cargo da promotora i-radia Crea, fixo balance este luns destacando o impacto económico xerado, que superou o millón de euros. A ocupación hoteleira foi elevada e máis de 150 persoas traballaron no desenvolvemento do festival. As experiencias paralelas, como os concertos en catamarán polo Sil ou as catas musicais en adegas, reuniron a 400 participantes. O festival, recoñecido durante catro anos consecutivos nos Iberian Festival Awards como mellor microfestival, xa pensa na súa décima edición en 2026, para a que se anuncian novidades. Mentres, a organización celebra o éxito dun formato que aposta pola calidade, a proximidade e a posta en valor da Ribeira Sacra.•