A tradición oral e musical da Terra de Lemos protagoniza un novo episodio de Folcast

O proxecto Folcast, impulsado pola Vicepresidencia da Deputación de Lugo, lanza un novo episodio centrado na Terra de Lemos, onde se recollen diferentes expresións da oralidade e da música tradicional. A condución corre a cargo de Xosé Gago e Vanesa de Vilaesteva, quen realizan entrevistas a persoas vencelladas a este ámbito territorial, sen limitarse a fronteiras administrativas.
Nesta entrega participa Xosé Maceda, exintegrante de Quempallou e construtor de instrumentos de percusión, que achega a súa visión sobre a artesanía musical. Tamén se inclúe unha conversa con Nerea López, da Asociación Veciñal de Fornelas, arredor do impacto social das Foliadas Guímaras da Pobra do Brollón.
O episodio incorpora ademais a adaptación dun conto tradicional a cargo da cantareira e narradora María da Pontragha, xunto con pezas musicais adicionais.
Folcast xa conta con outras dúas entregas dispoñibles en plataformas como Spotify, iVoox, Apple Podcasts e Amazon Music. A primeira aborda o xénero oral do brindo, con Séchu Sende, Nuria Penas e gravacións de brindeiros de Forgas. A segunda céntrase na artista e investigadora Carme López, do Incio, quen reflexiona sobre a evolución da música tradicional desde o seu proxecto Carmela. O seguimento do proxecto pódese facer tamén a través do perfil @folcast_radio en Instagram.•