Foto GPXG.
A Consellería do Medio Rural destinou este ano máis de 1,3 millóns de euros en axudas á conservación da contorna paisaxística e á loita contra a erosión nos viñedos da Denominación de Orixe Ribeira Sacra. Así o destacou a conselleira, María José Gómez, nunha visita ao concello de Sober, onde estivo acompañada pola directora da Axencia Galega de Desenvolvemento Rural, Paz Rodríguez. Nesta localidade lucense, a titular de Medio Rural coñeceu os terreos dalgúns dos viticultores beneficiarios destas achegas, que permiten actuar sobre unha superficie de 810 hectáreas. Sober, con 170 hectáreas aprobadas, é o concello con maior superficie subvencionada.
Días despois, Rodríguez visitou tamén a adega Alma das Donas en Pantón, onde puxo en valor o papel do cultivo tradicional en socalco con muros de pedra na configuración da paisaxe da Ribeira Sacra. As achegas cobren 520 hectáreas en socalco e outras 291 en terreos sen socalcos ou con traballo mecanizado. A directora sinalou que o sector vitivinícola actúa como motor económico e contribúe á fixación de poboación, á remuda xeracional e á dinamización do medio rural. As axudas abranguen parcelas de 16 dos 20 concellos da DO e forman parte dun paquete máis amplo que inclúe medidas como achegas para destilación de crise, promoción do viño ou apoio ao ecorrexime da PAC.
Ademais, o conxunto destas actuacións contribúe á candidatura da Ribeira Sacra como Patrimonio da Humanidade da Unesco, coa conservación da súa paisaxe como eixo central. O Goberno galego incide tamén na importancia de reforzar a proxección internacional dos viños desta denominación a través da calidade, a innovación e a diversificación comercial.•
Cargando ...
