Albores consolida en Monforte un modelo de apoio integral ás persoas con enfermidade mental

A asociación atende a poboación vulnerable do sur de Lugo con programas específicos de rehabilitación, inclusión e atención con perspectiva de xénero

A asociación Albores continúa a reforzar o seu traballo no ámbito da saúde mental na zona sur da provincia de Lugo cun modelo integral de atención a persoas diagnosticadas con enfermidades mentais e ás súas familias. A entidade, con sedes en Monforte e Chantada, estende a súa actividade a once municipios da contorna e desenvolve programas específicos que buscan mellorar a calidade de vida dun colectivo que afronta barreiras sociais, xeográficas e asistenciais.
Entre as iniciativas en marcha destaca o programa ‘Rede Mente: mulleres e saúde mental’, no que participan 15 mulleres residentes no rural e que conta cun equipo multidisciplinar composto por psicóloga, traballadora social, terapeuta ocupacional e asesora xurídica. A intervención busca mellorar as competencias persoais e sociais das participantes, introducindo unha perspectiva de xénero e interseccional que permite detectar e paliar situacións de dobre vulnerabilidade.
No eido da inclusión social, Albores executa o programa ‘Vive con saúde mental’, centrado na rehabilitación residencial, ademais de contar con dous pisos protexidos e servizos como axuda no fogar especializada, comedor, centro de día e apoio xudicial. A entidade tamén promove accións de prevención do suicidio, respiro familiar, ocio e sensibilización social.
O labor de Albores foi coñecido de preto polas deputadas do PP Raquel Arias e Katy Varela durante unha visita ao centro de Monforte. Na última anualidade, a entidade recibiu máis de 89.000 euros en axudas da Xunta para impulsar os seus programas.
A asociación realiza desprazamentos a domicilios para facilitar o acceso das persoas con dificultades de mobilidade, especialmente no rural, onde a combinación de enfermidade mental e illamento xeográfico agrava a exclusión.•