A oferta da Deputación de Lugo consolídase como reclamo turístico entre marzo e decembro, cunha elevada demanda estival
As rutas fluviais en catamarán que promove a Deputación de Lugo na Ribeira Sacra rexistraron a participación de máis de 29.000 persoas desde o inicio da tempada, o pasado 22 de marzo, ata a primeira semana de agosto. Esta proposta turística mantense activa ata o mes de decembro e ofrece dúas rutas principais: a do Canón do Sil, con saída desde o embarcadoiro Ponte do Sil, en Monforte de Lemos; e a de Cabo do Mundo, que parte de Belesar Pobo, no Saviñao.
Segundo informou a deputada Pilar García Porto, máis de 13.000 pasaxeiros embarcaron durante os meses de verán, entre o 21 de xuño e finais de xullo. Ademais, xa se contabilizan preto de 14.000 prazas reservadas ata o remate da campaña, o que indica a continuidade da elevada demanda.
A iniciativa consolídase como un elemento clave dentro da oferta turística da provincia, ao permitir descubrir a paisaxe da Ribeira Sacra desde unha perspectiva fluvial. Este servizo encaixa cun modelo de turismo sostible e centrado na experiencia, que contribúe á dinamización económica e á valorización do territorio.
As reservas poden realizarse a través da web reservas.rutasembalses.es, onde tamén está dispoñible a información detallada das rutas.•
Cargando ...
