En dous minutos, pódense coñecer os mellores recunchos da provincia na serie de vídeos que produce o Servizo de Audiovisuais da Deputación
Á esquerda, imaxe do vídeo sobre o Museo Etnográfico de Quiroga. Captura de pantalla.
A Ribeira Sacra, como o conxunto das terras da provincia de Lugo, contan cun escaparate de luxo en internet. “Descubrindo Lugo” é un espazo virtual que, a través de vídeos de dous minutos de duración, amosa a esencia dos tesouros naturais e patrimoniais de toda a provincia. Esta iniciativa, desenvolvida dende o Servizo de Audiovisuais da Deputación, non só vai destinada a divulgar estes recursos naturais, históricos, culturais e etnográficos, senón que tamén busca educar e informar sobre o propio patrimonio, reforzando a identidade lucense.
ROTEIROS, ARTE, ARQUEOLOXÍA E TRADICIÓNS VIVAS DE TODO LUGO, EN TAN SÓ DOUS MINUTOS
Dende que se puxo en marcha esta iniciativa, pódense atopar en internet e nas redes sociais máis de 330 vídeos, que reúnen contidos para todos os gustos. Os amantes da natureza gozarán coas pezas adicadas ás rutas de sendeirismo, os miradoiros e as fervenzas, auténticos espectáculos dunha terra onde a auga é unha das protagonistas.
Por outra banda, é posible facer unha viaxe no tempo en só un par de minutos, sobrevoando os xacementos arqueolóxicos castrexos e romanos, ou penetrando nos museos, igrexas e castelos que conservan a fonda pegada da Historia. Así, resérvase unha atención especial para os espazos de conservación e divulgación, dentro da sección “Descubrindo os Museos de Lugo”. A través destas pezas audiovisuais, pódense coñecer coleccións históricas pero tamén propostas de arte contemporánea, cun formato atractivo que espertará a curiosidade por achegarse a Lugo. Xa de volta ao presente, “Descubrindo Lugo” leva ao visitante virtual a coñecer as vilas e aldeas con patrimonio arquitectónico e tradicións vivas, para completar o amplo panorama que configura aos 67 concellos da provincia de Lugo.
ALGO MÁIS QUE VÍDEOS
A iniciativa “Descubrindo Lugo” pretende ir máis aló da divulgación turística, para transformar o audiovisual nun vehículo de coñecemento, identidade e patrimonio, levando esta riqueza ao público xeral cun formato atractivo e accesible.•
Cargando ...
