Dez ideas empresariais foron seleccionadas como finalistas na XI edición do Concurso de Proxectos Empresariais Semente Ribeira Sacra, tras un proceso no que participaron máis de 70 persoas e máis de medio cento de propostas que cumprían coas bases. As iniciativas escollidas abranguen un amplo abano de sectores, desde a transformación de residuos vexetais en papel ata a destilación artesanal, pasando pola cosmética ecolóxica, a tecnoloxía aplicada ao viñedo ou a recuperación de espazos rurais con fins culturais e turísticos.
Entre as propostas figuran GALEGHEEÑO, un ghee elaborado con leite de vacas alimentadas a pasto; RESPIRO SOSTIBLE, centrado na creación de papel sostible; ALAMBIQUEIROS DA SACRA TERRA, unha destilería profesional baseada en bagazo local; ou VIÑALERT, sistema de monitorización para vides. Tamén foron seleccionadas iniciativas de turismo personalizado, franquías de produtos galegos, cosmética sólida con auga termal, espazos educativos e unha queixería con visitas e degustacións.
Os promotores participarán nun programa de formación para mellorar a posta en marcha das ideas seleccionadas. Ademais, os tres proxectos mellor valorados polo xurado recibirán premios en metálico de 10.000, 6.000 e 4.000 euros.
A fase final celebrarase o 8 de novembro, cando os finalistas defenderán publicamente os seus proxectos nun acto no Parador de Turismo de Monforte. Nesa mesma xornada terá lugar a entrega de premios e a cea de clausura da undécima edición.•
Cargando ...
