O Concello programa sesións vermú, actividades infantís e verbenas entre o 16 e o 18 de agosto
O Concello de Pantón organiza un ano máis as Festas Patronais de Ferreira, que se celebrarán do 16 ao 18 de agosto en honra a Santa María. A programación inclúe música, actividades infantís e propostas para todos os públicos coa intención de dinamizar social e culturalmente a capitalidade municipal durante a ponte festiva.
As celebracións comezarán o sábado 16 ás 11:30 horas con sesión vermú polos bares de Ferreira. Ás 14:00 horas, a música trasladarase á Praza de Goián. Pola noite, desde as 22:30 horas, celebrarase a primeira verbena a cargo do grupo D´Kriss e unha sesión de DJ.
O domingo 17 terá lugar a misa solemne na honra da patroa, coa actuación do grupo Trícole. As sesións vermú repetiranse tanto en Ferreira como en Goián. Ás 17:30 horas arrancarán as actividades infantís de Infantilandia na Piscina Municipal. Xa pola noite, desde as 21:30 horas, a festa continuará coas orquestras Sinfonía e Principal.
O luns 18 abrirá novamente con sesións vermú desde as 11:30 horas. Pola tarde, as propostas de Infantilandia terán lugar na Praza do Concello a partir das 17:30 horas. A verbena de despedida arrancará ás 21:00 horas e contará coas orquestras Saudade e Combo Dominicano.
Desde o Concello destácase que estas datas coinciden co regreso de moitas familias ao municipio, o que contribúe a revitalizar a vida social local. O goberno municipal anima á participación veciñal e lembra que estas festas son tamén unha oportunidade para dar a coñecer o patrimonio, a paisaxe e a cultura de Pantón.•
Cargando ...
