Un grupo de mozos e mozas procedentes de oito países participa este verán nun campo de traballo internacional en Quiroga, promovido pola Consellería de Cultura, Lingua e Xuventude en colaboración coa área de Xuventude do Concello. A iniciativa, que se desenvolve entre o 24 de xullo e o 3 de agosto, céntrase na posta en valor da fervenza coñecida como “O Pozo do Batán”, situada no río Ferreiriño, nas proximidades do pregamento xeolóxico de Campodola e da ruta de sendeirismo PRG-192.
Durante as xornadas de voluntariado, as persoas participantes executaron labores de roza, limpeza e sinalización do acceso á fervenza. Entre as actuacións máis destacadas figura a construción dunha escaleira de madeira e terra que facilita a chegada ao enclave natural. O obxectivo é mellorar a accesibilidade e promover este espazo dentro da oferta de natureza e sendeirismo do municipio.
O alcalde de Quiroga, José Luís Rivera, e o concelleiro de Medio Rural, Medio Ambiente e Xuventude, Luis Manuel Arias, achegáronse ata a zona para supervisar os traballos e agradecer o esforzo do grupo, que tamén está a elaborar un vídeo promocional sobre a fervenza, o Xeoparque “Montañas do Courel” e as rutas de sendeirismo do concello.
ACTIVIDADES CULTURAIS E RECREATIVAS
A experiencia inclúe, ademais, actividades paralelas de carácter cultural e recreativo. O programa contempla unha ruta guiada á antiga mina romana de Montefurado, visitas aos museos locais e ao pregamento xeolóxico de Campodola-Leixazós, así como a participación nunha cata de viños da zona.
Con este campo de traballo, o Concello de Quiroga reforza a súa aposta pola posta en valor do patrimonio natural e xeolóxico, ao tempo que promove o intercambio cultural e a implicación da mocidade na conservación do territorio.•
Cargando ...
