O cambio climático obriga ao grupo 3Cumios a modificar a súa expedición nos Andes peruanos

O grupo de montaña 3Cumios, con membros vinculados á Ribeira Sacra, viuse obrigado a replantexar a súa expedición ao Huascarán (6.768 m), o pico máis alto do Perú, tras atopar grandes fendas e pontes de xeo en risco de colapso pola aceleración do desxeo. Segundo informaron os propios expedicionarios, “ningunha cordada está a subir actualmente” debido ás condicións adversas. O prestixioso alpinista peruano César Rosales advertiu do “extremo risco” pola subida das temperaturas. Ante esta situación, o grupo acometeu a ascensión ao Nevado Pisco (5.757 m) e ao Vallunaraju (5.686 m), dúas cimas da Cordilleira Branca que lograron coroar en condicións de total autonomía e con mochilas de máis de 25 kg. •