O centro de Sarria converteuse, por duodécimo ano consecutivo, nun circuíto de alta dificultade para amantes do ciclismo extremo, coa celebración do Descenso Urbano Vila de Sarria. A cita, organizada polo club DH Galicia, reuniu ao longo de dúas xornadas a algunhas das figuras máis recoñecidas da modalidade a nivel estatal, que ofreceron ao público espectaculares baixadas e acrobacias en plena rúa Marqués de Ugena.
O venres, primeira das dúas xornadas, destacou pola celebración do DIRT Vila de Sarria, unha modalidade na que os participantes deben realizar todo tipo de manobras e piruetas durante o perigoso percorrido urbano. Nomes como Marco Veiga e Toni Ferreiro foron protagonistas dun espectáculo visual que volveu converter a proba nun referente do calendario nacional.
O sábado celebrouse a proba cronometrada, na que Marco Veiga, do club Ciclos Quintena, marcou o mellor tempo (1.24.833) na categoría absoluta masculina. Tras el clasificáronse Toni Ferreiro (1.25.910), de Coruxo, e Kevin Xoel Méndez (1.26.750), de Rocasport Giant. Moi preto do podio quedou Jorge Luis López, do DH Galicia, cun rexistro de 1.29.711.
Na categoría feminina, o mellor tempo foi para Alba Arias (Ciclos Quintena), que completou o trazado en 1.40.445. Eva Castro, en representación da Federación Galega de Ciclismo, foi segunda con 1.47.930.
Tamén houbo competición nas categorías base e veterás. Entre os sub-23 venceron Héctor Quinteiro (Team Bici Verde-Bopapel) e Cristina Menéndez (Cuetos Bike). Nos demais grupos impuxéronse David López (júnior), Miguel Blanco (cadete), Daniel Ruiz (máster 30), Víctor Sáenz (máster 40) e José Manuel Quintas (máster 50).
O evento reafirmou a vila de Sarria como referente e punto de encontro do ciclismo de descenso urbano.•
Cargando ...
