As obras de mellora da estrada Monforte-Sober entran na súa fase final

A intervención abrangue case dous quilómetros de vía entre San Lázaro e Piñeira, cun investimento superior aos 400.000 euros destinado a reforzar a seguridade viaria e a accesibilidade

O alcalde de Monforte e presidente da Deputación de Lugo, José Tomé Roca, visitou recentemente as obras de mellora que se executan na estrada provincial LU-P-3201, que une Monforte con Sober, nun treito comprendido entre a Capela de San Lázaro e a parroquia de Piñeira. Acompañado pola tenente de alcalde, Gloria Prada, por técnicos do servizo de Vías e Obras da Deputación e por responsables da empresa adxudicataria, Ovisa, o rexedor comprobou o avance dos traballos, que se atopan xa nunha fase moi avanzada e que estarán concluídos en breve. O orzamento do proxecto, asumido na súa totalidade pola Deputación, supera os 400.000 euros.
Segundo explicou Tomé, trátase dunha intervención de especial relevancia, xa que afecta a unha das estradas provinciais con maior tránsito, tanto por servir de conexión directa entre Monforte e Sober como por constituír unha das entradas á cidade. Ademais, no seu primeiro treito dá servizo a instalacións como o complexo polideportivo da Pinguela, o IES A Pinguela e a Escola Obradoiro municipal, así como a diversas vivendas.
En conxunto, os traballos afectan a case dous quilómetros de vía.
O proxecto elaborado polo servizo de Vías e Obras contempla a reapertura e limpeza das cunetas, a reparación do drenaxe transversal e a instalación dunha nova canaleta baixo o paso a nivel, mellorando así a evacuación das augas. Tamén se inclúe a reposición do firme cunha nova capa de mestura bituminosa en quente, o que permitirá dotar á estrada dunha maior capacidade estrutural e dunha superficie máis regular.
Na parte máis urbana, prevese a pavimentación con formigón alisado en determinados tramos e a execución dunha rigola prefabricada para separar o firme da zona peonil. Desta maneira, facilitarase a creación dunha cuneta transitable para as persoas que se desprazan a pé e mellorarase o acceso á ponte inferior do ferrocarril, así como os espazos de estacionamento situados diante do instituto e da Escola Obradoiro.
Unha vez completada a pavimentación, procederase ao repintado da sinalización horizontal con marcas reflexivas, incluíndo pasos de peóns e paradas de autobús, así como á reposición da sinalización vertical deteriorada. Ademais, instalaranse bandas sonoras na contorna do IES A Pinguela para reducir a velocidade dos vehículos.
O alcalde subliñou que “estamos a actuar nunha vía que soporta un volume moi elevado de tráfico, tanto de vehículos que se desprazan entre Monforte e Sober como daqueles que acceden á cidade desde Piñeira. Esta mellora beneficiará directamente aos veciños da zona e a todas as persoas que empregan a estrada para acceder a instalacións deportivas e educativas”, explicou.
Tomé destacou, ademais, que a actuación se enmarca nun proceso máis amplo de renovación dos espazos públicos da contorna, onde xa se executaron obras de mellora no pavillón polideportivo e no aparcadoiro, e se acometeu a reforma integral da piscina municipal.•