O secretario xeral do PSdeG, José Ramón Gómez Besteiro, abriu en Ourense o curso político cun encontro de alcaldes, alcaldesas e voceiros socialistas de toda Galicia, no que participaron tamén os presidentes das deputacións de Lugo e A Coruña, José Tomé e Valentín González Formoso, e o presidente da Fegamp, Alberto Varela. A cita contou con rexedores de Vigo, Monforte, Cerceda e Ribeira de Piquín, así como cos da provincia de Ourense máis afectados polos incendios, e coa presenza online doutros concellos.
Besteiro explicou que a reunión dá cumprimento á promesa feita en Vilamartín de Valdeorras tras a vaga de lumes, para analizar o sucedido e preparar unha resposta política. Sinalou que a prioridade inicial foi protexer vidas e bens, pero agora toca pedir responsabilidades a un PP que cualificou de “incompetente” e “neglixente”.
O líder socialista lembrou que a Xunta non aplicou as medidas acordadas no ditame sobre incendios de 2018 e denunciou a falta de planificación ante a emerxencia climática.•
Cargando ...
