O Concello de Monforte de Lemos e a Xunta de Galilcia clausuraron esta semana o obradoiro dual de emprego “Rehabilitación Naves Escola Obradoiro A Pinguela II”, que contou cun investimento total de 417.928 euros procedentes de fondos estatais, autonómicos e municipais.
FORMACIÓN EN DÚAS ESPECIALIDADES
O alcalde, José Tomé Roca, acompañado pola tenente de alcalde, Gloria Prada, e pola directora territorial de Emprego, Carmen José López, entregou os diplomas e certificados de profesionalidade aos vinte alumnos e alumnas participantes.
O programa desenvolveuse entre decembro de 2024 e agosto de 2025, cunha duración de nove meses, e incluíu formación en dúas especialidades: albanelaría, con doce participantes, e carpintería, con oito. O cadro de persoal completouse con dous docentes, unha directora e unha administradora.
As actuacións realizadas permitiron rehabilitar o alpendre anexo á nave do taller de cantería, restaurar o almacén auxiliar, construír soportais de madeira nas entradas de varios módulos e acondicionar espazos interiores da parcela. Tamén se interveu en elementos de mobiliario urbano municipal, como bancos, papeleiras e xardineiras, mellorando o seu estado de conservación.
O rexedor destacou que, ademais da formación, o Concello comprometeuse a apoiar a inserción laboral mediante incentivos ás empresas que contraten alumnado durante un mínimo de tres meses, cunha achega de 1.500 euros por persoa.•
Cargando ...
