O Concello de Monforte vén de adxudicar o contrato para a posta en marcha do novo servizo de transporte público nas parroquias do municipio, logo de aprobar a concesión á empresa Palacios Bus S.L., única licitadora, por un importe de 972.759,55 euros e cun prazo de duración de dez anos. O contrato prevé a incorporación dun autobús novo, modelo Scania con 41 prazas, adaptado para persoas con mobilidade reducida e dotado de tecnoloxías de seguridade, accesibilidade universal, xeolocalización e sistema de información ao usuario.
O servizo estrutúrase en cinco rutas principais e unha adicional, que conectarán as parroquias co centro urbano, con paradas en puntos estratéxicos como a estación de tren, a estación de autobuses, o Hospital Comarcal e o aparcamento do Parque dos Condes. O horario será de luns a venres, entre as 8:00 e as 15:00 horas.
A empresa comprométese a dispoñer de condutores con formación específica, persoal de reforzo e protocolos de continxencia ante incidencias. Inclúe tamén un plan de seguimento con enquisas anuais e informes periódicos. O contrato contempla que, ao rematar o prazo, o vehículo pase a ser propiedade do Concello. O alcalde destacou que este novo servizo gratuíto cumpre un compromiso co rural, mellorando a mobilidade da veciñanza e facilitando o acceso á cidade.•
Cargando ...
