Pontón pide a dimisión de Rueda pola xestión da vaga de lumes

A portavoz nacional do BNG, Ana Pontón, reclamou a dimisión de Alfonso Rueda tras a vaga de incendios que afectou Galicia no mes de agosto. Desde Verín, logo de visitar tamén Monterrei e Oímbra, acusou ao presidente da Xunta de chegar tarde na prevención, no despregamento do dispositivo e na resposta á emerxencia, lembrando que coincidiu coa súa presenza nun acto político en Pontevedra cando xa ardía parte do territorio.
Pontón responsabilizou directamente ao Executivo galego pola falta de medios e pola redución de efectivos no servizo de extinción respecto a 2008, ademais de desatender recomendacións de expertos que pedían reforzar a dotación en Ourense. Criticou igualmente a redución temporal das franxas de protección arredor dos núcleos de poboación e a insuficiencia dos fondos de prevención, cun 80% das solicitudes de comunidades de montes sen atender na última convocatoria.
A líder nacionalista advertiu de que, segundo as súas cifras, a Xunta deixou sen executar este ano máis de once millóns de euros destinados á prevención, e denunciou que a situación evidencia anos de desmantelamento das políticas forestais.
Presentou o plan “Da Cinza á Vida”, que propón duplicar fondos de prevención en dous anos, crear un plan de emprego verde con 50 millóns de euros, ampliar as franxas de protección a 100 metros e aprobar plans de ordenación forestal antes de 2026, así como incrementar brigadas de intervención rápida e vixilancia.•