A Casa da Cultura de Quiroga acolleu ata o venres 29 de agosto a exposición itinerante sobre o Ano Xubilar Romano 2025, patrocinada pola Xunta. A mostra reuniu dez paneis, vitrinas e outras pezas que permitiron achegar ao público o contido da bula Spes non confundit e diversos elementos vinculados á tradición cristiá dos xubileos, coñecida en Galicia sobre todo pola súa versión compostelá.
Na visita institucional participaron o director territorial da Consellería de Cultura, Lingua e Xuventude, Manuel Antonio Fernández; o párroco da Ermida, Jesús Río, responsable da preparación da mostra; o alcalde de Quiroga, José Luis Rivera; e representantes da Diócese de Lugo. O proxecto contou tamén co apoio da Secretaría Xeral da Lingua pola súa contribución á promoción do galego en ámbitos sociais como o relixioso.
Tras a súa estadía en Quiroga, a exposición continúa o seu percorrido por Galicia ata a clausura do Ano Xubilar, prevista para o 6 de xaneiro de 2026. A seguinte parada será na igrexa de San Xoán de Becerreá, do 9 ao 20 de setembro.•
Cargando ...
