A Deputación de Lugo investirá máis de 900.000 euros en melloras viarias na provincia

A Xunta de Goberno da Deputación de Lugo aprobou investimentos por 905.843,87 euros destinados á mellora da mobilidade e ao mantemento de servizos da provincia. O paquete inclúe actuacións en sete estradas provinciais situadas nos concellos de Palas de Rei, O Saviñao, Pantón, Barreiros, O Corgo e Navia de Suarna, ademais de contratos para o mantemento da maquinaria do Parque Móbil e da Granxa Gayoso Castro.
En Palas de Rei licitouse por preto de 95.000 euros a rehabilitación dun treito urbano da LU-P-2901, de 816 metros, entre o cruce coa N-547 e a rúa Agro do Rolo. As obras, cun prazo de tres meses, inclúen melloras de drenaxe, afirmado e sinalización.
No Saviñao e Pantón, a empresa Fevisa Vías y Obras SL acometerá por 118.000 euros a mellora de distintos tramos das estradas LU-P-4102, LU-P-3202 e LU-P-3208, fundamentais para a comunicación da Ribeira Sacra. Os traballos consistirán na reapertura de cunetas, pavimentación e reposición da sinalización.
En Barreiros, Construcciones Isidro Otero SL intervirá por 206.355,82 euros na LU-P-0610, que conecta as praias de Altar, Reinante e As Catedrais. As actuacións abranguen un tramo urbano de 1,3 quilómetros con melloras de drenaxe, iluminación, aglomerado en quente e sinalización.
No Corgo, a empresa Francisco Gómez y Cía SL executará por 140.942 euros a rehabilitación dun quilómetro e medio da LU-P-1611, coñecida como cinto comarcal, entre Camposo e Pacios. O proxecto abrangue a repavimentación, o pintado da vía e a reposición da sinalización vertical.
En Navia de Suarna, Hordescón SL recibirá 324.772,05 euros para mellorar a LU-P-3506, que conecta Louxas co límite asturiano. Os traballos, cun prazo de tres meses, inclúen a reapertura de cunetas, aglomerado en quente e nova sinalización.
Ademais, a Deputación aprobou licitar por 21.000 euros o contrato de mecanizado do Parque Móbil, con vixencia inicial dun ano prorrogable ata catro, e por 18.000 euros o servizo de mantemento de tractores e maquinaria da Granxa Gayoso Castro, garantindo o bo funcionamento dos equipos.•